ராகவா லாரன்ஸ்…

லோகேஷ் கனகராஜ் இயக்கத்தில் கமல் நடிப்பில் உருவாகி வரும் விக்ரம் படத்தில் ராகவா லாரன்ஸ் விலகியது குறித்து காரணம் வெளியாகியுள்ளது.

நடிகர் கமலின் 232 வது படம் ‘விக்ரம்’. கமலின் சொந்த தயாரிப்பு நிறுவனமான ராஜ்கமல் பிலிம்ஸ் தயாரிக்கும் இப்படத்தை லோகேஷ் கனகராஜ் இயக்குகிறார்.

அனிருத் இசையமைக்க இருக்கும் இப்படத்தில் பிரபல மலையாள நடிகர் பஹத் பாசில் வில்லன் கதாபாத்திரத்தில் நடிக்கிறார்.

முதலில் இந்த கதாபாத்திரத்தில் ராகவா லாரன்ஸ் நடிக்க இருந்தது. சில காரணங்களால் விக்ரம் படத்தில் ராகவா லாரன்ஸ் நடிக்கவில்லை. அதற்கான காரணம் தற்போது வெளியாகியுள்ளது.

ராகவா லாரன்ஸ் தற்போது ருத்ரன் படத்தில் பிசியாக நடிப்பதாலும், அதன்பின் சந்திரமுகி 2 படத்தின் வேலைகள் இருப்பதாலும் கமலின் விக்ரம் படத்தில் நடிக்க முடியாமல் போன காரணம் என்று லாரன்ஸ் விளக்கம் அளித்துள்ளார்.

வணக்கம் டா மாப்ள…

ஜிவி பிரகாஷ் நடிப்பில் உருவாகி இருக்கும் படத்தை வருகிற தமிழ் புத்தாண்டன்று நேரடியாக டி.வி.யில் வெளியிட உள்ளனர்.

கொரோனா பரவல் காரணமாக கடந்தாண்டு ஊரடங்கு போடப்பட்டதை அடுத்து, ஓடிடி-யில் படங்கள் நேரடியாக வெளியிடப்பட்டன. அதேபோல் யோகிபாபுவின் ‘நாங்க ரொம்ப பிஸி’, ‘மண்டேலா’, விக்ரம் பிரபுவின் ‘புலிக்குத்தி பாண்டி’, சமுத்திரகனியின் ‘ஏலே’ ஆகிய படங்கள் நேரடியாக டி.வி.யில் வெளியிடப்பட்டன.

அந்த வகையில் தற்போது நேரடி டி.வி. வெளியீட்டிற்காக தயாராகி உள்ள படம் ‘வணக்கம்டா மாப்ள’. ஜிவி பிரகாஷ் நாயகனாக நடித்துள்ள இப்படத்தை ராஜேஷ் இயக்கி உள்ளார். இவர் ஏற்கனவே சிவா மனசுல சக்தி, பாஸ் என்கிற பாஸ்கரன் போன்ற படங்களை இயக்கி பிரபலமானவர்.

இப்படத்தில் ஜிவி பிரகாஷுக்கு ஜோடியாக பிகில் பட நடிகை அம்ரிதா ஐயர் நடித்துள்ளார். மேலும் ஆனந்தராஜ், ரேஷ்மா, டேனியல் ஆகியோர் முக்கிய கதாபாத்திரங்களில் நடித்துள்ளனர்.

இந்நிலையில், ‘வணக்கம்டா மாப்ள’ படத்தின் வெளியீட்டு தேதி அறிவிக்கப்பட்டுள்ளது. அதன்படி வருகிற ஏப்ரல் 14-ந் தேதி தமிழ் புத்தாண்டன்று, நேரடியாக டி.வி.யில் ரிலீஸ் செய்ய உள்ளதாக படக்குழு அறிவித்துள்ளது.

விக்ரம்…

இயக்குனர் லோகேஷ் கனகராஜ் தற்போது தமிழ் சினிமாவின் மிக முக்கிய இயக்குனர்களில் ஒருவராக உள்ளார், இவர் இயக்கத்தில் வெளியான மூன்று திரைப்படங்களும் பிளாக் பஸ்டர் ஆகியுள்ளது.

கடைசியாக இவர் இயக்கத்தில் தளபதி விஜய் நடிப்பில் வெளியான மாஸ்டர் திரைப்படம் மாபெரும் வெற்றியடைந்துள்ளது.

அதனை தொடர்ந்து இவர் உலகநாயகன் கமலை வைத்து விக்ரம் படத்தை இயக்கவுள்ளார். மேலும் கமல் உடன் லோகேஷ் எடுத்துக்கொண்ட சமீபத்திய புகைப்படத்தை இன்று பதிவிட்டு இருந்தார்.

இந்நிலையில் இந்திய திரையுலகில் தற்போது உள்ள மிக சிறந்த நடிகர்களில் ஒருவர் தான் பஹத் பாசில், கமலுடன் விக்ரம் படத்தில் நடிப்பதாக பேட்டி ஒன்றில் உறுதி செய்திருந்தார்.

இதனிடையே விக்ரம் படத்தின் ஷூட்டிங் மே 3 ஆம் தேதி ஆரம்பித்து 100 நாட்கள் வரை நடைபெறும் எனவும் தகவல் வெளியாகியுள்ளது. விக்ரம் படத்திற்காக கமல், பஹத் பாசில், பிரபு தேவா, லோகேஷ் கனகராஜ் கூட்டணி இணையவுள்ளதால் ரசிகர்கள் ஆவலோடு உள்ளனர்.

சமந்தா…

சகுந்தலை படத்தில் சகுந்தலா கதாபாத்திரத்தில் நடிக்க அனுஷ்கா, பூஜா ஹெக்டே ஆகியோர் பரிசீலிக்கப்பட்டன, இறுதியில் சமந்தாவை ஒப்பந்தம் செய்தனர்.

சகுந்தலை புராண கதை சினிமா படமாக தயாராகிறது. இந்த படத்தில் சகுந்தலையாக நடிகை சமந்தா நடிக்கிறார். இந்த படம் நேரடியாக தமிழ், தெலுங்கு உள்ளிட்ட மொழிகளில் தயாராகிறது.

குணசேகர் இயக்குகிறார். இவர் ஏற்கனவே அனுஷ்கா நடித்து தமிழ், தெலுங்கில் வெளியான ருத்ரமா தேவி படத்தை இயக்கியவர். சகுந்தலை படத்தில் சகுந்தலா கதாபாத்திரத்தில் நடிக்க அனுஷ்கா, பூஜா ஹெக்டே ஆகியோர் பரிசீலிக்கப்பட்டனர். இறுதியில் சமந்தாவை ஒப்பந்தம் செய்தனர்.

இந்தப் படத்தில் நடிக்க சமந்தா ரூ.2.50 கோடி சம்பளம் வாங்குகிறார். இதற்கு முன்பு ரூ.3 கோடி வாங்கிய சமந்தா, சகுந்தலை படத்தில் தனது கதாபாத்திரம் பிரதானமாக இருப்பதாலும்,

தான் நடிக்கும் முதல் புராண படம் என்பதாலும் சம்பளத்தை ரூ.50 லட்சம் குறைத்து இருக்கிறார். இப்படத்தின் படப்பிடிப்பு விறுவிறுப்பாக நடைபெற்று வருகிறது. இதில் சமந்தாவுக்கு ஜோடியாக இளம் நடிகர் தேவ் மோகன் நடிக்கிறார்.

பவித்ரா…

பிரபல விஜய் டிவி தொலைக்காட்சியில் ஒளிபரப்பாகி வரும் மிக முக்கிய நிகழ்ச்சி தான் குக் வித் கோமாளி, இந்த ஒரு நிகழ்ச்சிக்கு ரசிகர்கள் வட்டம் மிகவும் அதிகமாக உள்ளனர்.

மேலும் தற்போது நடந்து வரும் குக் வித் கோமாளி சீசன் 2 நிகழ்ச்சி இறுதிப்போட்டியை எட்டியுள்ளது. இதில் அஸ்வின், பாபா பாஸ்கர், ஷகீலா, பவித்ரா, கனி உள்ளிட்டோர் போட்டி போடவுள்ளனர்.

இதனிடையே குக் வித் கோமாளி நிகழ்ச்சி மூலம் பிரபலமான முக்கிய போட்டியாளர் தான் பவித்ரா, சின்னத்திரையில் பிரபலமான பவித்ரா தற்போது பெரிய திரையிலும் அறிமுகமாகவுள்ளார்.

ஆம், AGS தயாரிக்கும் படத்தில் நடிகர் சதிஷ் உடன் பவித்ரா நடிக்கவுள்ளார். நேற்று நடந்துள்ள இப்படத்தின் பூஜையில் நடிகர் சிவகார்த்திகேயனும் கலந்து கொண்டு சிறப்பித்துள்ளார்.

மேலும் முக்கிய நடிகர் சதிஷ்க்கு ஜோடியாக தான் பவித்ரா இப்படத்தில் நடிக்கவுள்ளார், பூஜையில் சிவகார்த்திகேயனுடன் பவித்ரா இருக்கும் புகைப்படங்களை கண்டு ரசிகர்கள் குழம்பியுள்ளனர்.

ஆனால் சிவகார்த்திகேயன் நடிகர் சதிஷின் நண்பர் என்பதால் அவர் இந்த பூஜையில் கலந்து கொண்டுள்ளார் என சதிஷ் பதிவிட்டுள்ளார்.

–@Ags_production #21
Shoot Started today @agscinemas @archanakalpathi @actorsathish @itspavitralaksh pic.twitter.com/D8hAjKgB6z

— Karthik Ravivarma (@Karthikravivarm) April 7, 2021

விஜய்-பிரபு தேவா…

தளபதி விஜய் மற்றும் விஜய் சேதுபதி நடிப்பில் இயக்குனர் லோகேஷ் கனகராஜ் இயக்கத்தில் கடந்த ஜனவரி மாதம் வெளியான திரைப்படம் தான் மாஸ்டர்.

இப்படம் 50 % இருக்கைகளுடன் வெளியாகி ரசிகர்களின் பேராதரவை பெற்றது, மேலும் கொரோனா காரணமாக இப்படம் குறித்து பல்வேறு சந்தேகங்கள் இருந்த நிலையில் மாஸ்டர் படம் பலருக்கும் நல்ல லாபத்தை கொடுத்தது.

இந்நிலையில் மாஸ்டர் படத்தை ஹிந்தியில் ரீமேக் செய்யவுள்ளதாக பரபரப்பு தகவல் இணையத்தில் வெளியானது. மேலும் அந்த படத்தில் சல்மான் நடிக்கவுள்ளதாகவும் கூறப்படுகிறது.

இதனிடையே மாஸ்டர் ரீமேக் படத்தை பிரபுதேவா இயக்கவுள்ளதாக நம்பத்தகுந்த வட்டாரங்கள் கூறுகின்றன.

பிரபுதேவா ஏற்கனவே விஜய் நடித்த போக்கிரியை இந்தியில் சல்மான் கானை வைத்து வான்டட் என்ற பெயரில் இயக்கியிருந்தார் அந்தப் படமும் சூப்பர் ஹிட்டானது.

மேலும் சல்மான் கானை வைத்து பிரபு தேவா தபாங் 3 திரைப்படத்தை இயக்கியிருந்தார்.

அதனை தொடர்ந்து ராதே என்ற படத்தையும் இயக்கி வருகிறார் என்பது குறிப்பிடத்தக்கது.