தல அஜித்…..

தமிழ் சினிமாவில் தனக்கென ஒரு கூட்டத்தை உருவாக்கி வெற்றி நடை போட்டுக் கொண்டிருப்பவர் தல அஜித். சமீபகாலமாக தல அஜித் நடிக்கும் படங்கள் அனைத்துமே தொடர்ந்து வசூலை வாரி குவித்து வருகிறது.

மாஸ் படங்கள் மட்டுமில்லாமல் அஜித் கதைக்கு முக்கியத்துவம் கொடுத்து எடுக்கப்படும் படங்களும் பெரிய அளவில் வசூல் செய்து வருகின்றனர். அதற்கு எடுத்துக்காட்டாக அஜித் நடிப்பில் சமீபத்தில் வெளியான நேர்கொண்ட பார்வை படத்தை சொல்லலாம்.

அந்த வகையில் அடுத்ததாக தற்போது வலிமை படம் உருவாகி வருகிறது. பிரமாண்ட பட்ஜெட்டில் உருவாகி வரும் வலிமை படத்திற்கு தல அஜித் 50 கோடி சம்பளம் வாங்கியுள்ளதாக தகவல்கள் வெளிவந்துள்ளன. அதனைத் தொடர்ந்து மீண்டும் போனி கபூர் தயாரிப்பில் ஒரு படத்தில் நடிக்க உள்ளாராம்.

அதற்காக 70 கோடி வரை சம்பளம் பேசி உள்ளதாக செய்திகள் கிடைத்துள்ளன. படம் வெளியாவதற்கு முன்னரே ஒரு தயாரிப்பாளர் அஜித்தை நம்பி 20 கோடி அதிகமாக சம்பளம் கொடுப்பது அனைவருக்குமே அதிர்ச்சி தான். கேட்டால் எல்லாம் ஒரு நம்பிக்கைதான் என்கிறாராம்.

அஜித்துக்கு மட்டுமல்லாமல் மற்ற முன்னணி நடிகர்கள் 100 கோடி, 200 கோடி சம்பளம் வாங்குகிறார்களே அதை என்ன செய்வார்கள் என்ற யோசனை எப்போதுமே ரசிகர்கள் மத்தியில் அதிகமாக இருக்கும். அந்த வகையில் தல அஜீத் சமீபத்தில் வாங்கிய சம்பளத்தை கொண்டு 140 கோடியில் ஒரு பிரம்மாண்ட வீட்டை உருவாக்கி வருகிறாராம்.

ஏகப்பட்ட நவீன அம்சங்கள் கொண்டு உருவாகும் இந்த வீட்டின் வேலைகள் தற்போது நடந்து வருகிறதாம். இணையத்தில் தல அஜித்தின் புதிய வீட்டின் டிசைன் கொண்ட புகைப்படங்கள் நிறைய வந்து கொண்டிருக்கின்றன.

ஜகமே தந்திரம்…….

முதல் முதலில் தமிழிலிருந்து மிகப்பெரிய நடிகர் படம் நேரடியாக ஓடிடியில் வெளியானது சூர்யாவின் சூரரைப் போற்று படம்தான். இது சம்பந்தமாக சூர்யா பல்வேறு பஞ்சாயத்துகளை சந்தித்தார். ஆனால் காலப்போக்கில் எல்லாம் மாறிவிட்டது.

சூர்யாவைத் தொடர்ந்து சமீபத்தில் வெளியான மாஸ்டர் திரைப்படமும் தியேட்டரில் வெளியாகி அடுத்த பதினைந்தாவது நாளில் அமேசான் தளத்தில் வெளியானது குறிப்பிடத்தக்கது. இதற்கும் பல்வேறு சர்ச்சைகள் எழுந்தது.

இந்நிலையில் அடுத்ததாக தனுஷ் நடிப்பில் உருவாகியிருக்கும் ஜகமே தந்திரம் படமும் நெட்பிளிக்ஸ் தளத்தில் நேரடியாக வெளியாக உள்ளது. ஆனால் இந்த முறை நடிகர் மீது எந்த தவறும் இல்லை. தயாரிப்பாளரின் குளறுபடியே இத்தனைக்கும் காரணம்.

தனுஷ் ஜகமே தந்திரம் படம் தியேட்டரில் தான் வெளியாக வேண்டும் என மிகவும் வேண்டி விரும்பி கேட்டுக் கொண்டார். ஆனால் தியேட்டரை விட நெட்ப்ளிக்ஸ் ஓடிடி தளத்தில் நல்ல லாபம் கிடைத்ததால் தனுஷின் கோரிக்கையை மதிக்காமல் தயாரிப்பாளர் படத்தை தூக்கி கொடுத்து விட்டார்.

அதுவும் சும்மா இல்லை. சுமார் 55 கோடிக்கு ஜகமே தந்திரம் படம் விற்கப்பட்டுள்ளது. மேலும் ஆறு மொழிகளில் 190 நாடுகளுக்கு மேல் வெளியாக உள்ளதாம் ஜகமே தந்திரம். தனுஷின் ஜகமே தந்திரம் திரைப்படம் சூர்யாவின் சூரரைப்போற்று படத்தை விட 13 கோடி அதிகமாக விலை கொடுத்து வாங்கப்பட்டுள்ளதாம்.

சூர்யாவின் சூரரைப் போற்று திரைப்படம் 42 கோடிக்கு விற்பனையானது குறிப்பிடத்தக்கது. அதேபோல் தியேட்டரில் வெளியாகி மீண்டும் அமேசான் இணையதளத்தில் வெளியான மாஸ்டர் படம் 36 கோடிக்கு விற்பனையானது கூடுதல் தகவல். இதன் மூலம் நாளுக்கு நாள் தனுஷ் மார்க்கெட் உயர்ந்து கொண்டே செல்கிறது என்பது மட்டும் உறுதி.

விஜய் சேதுபதி…..

தமிழ் சினிமாவில் தற்போதைக்கு கைவசம் அதிக படங்கள் வைத்திருக்கும் நடிகராக வலம் வருபவர் விஜய் சேதுபதி. தமிழில் மட்டும் அல்லாமல் தெலுங்கு, ஹிந்தி என அனைத்து மொழிகளிலும் தற்போது பல படங்கள் கைவசம் வைத்துள்ளார்.

மாஸ்டர் படத்திற்கு பிறகு விஜய் சேதுபதியின் வரவேற்பு மற்ற மாநிலங்களில் எப்படி இருக்கிறது என்பது சொல்லித் தெரிய வேண்டியதில்லை. குறிப்பாக இந்தி மற்றும் தெலுங்கில் விஜய் சேதுபதி ஒரு நாளைக்கு ஒரு கோடி சம்பளம் கேட்டாலும் கொடுக்க ரெடியாக இருக்கிறார்கள்.

அந்த அளவுக்கு திறமையான நடிகரான விஜய் சேதுபதியை வைத்து ஐந்து வருடங்களுக்கு முன்பு ஒரு தோல்வி படத்தை கொடுத்த இளம் இயக்குநருக்கு தற்போது வரை பெரிய அளவு வாய்ப்பு கிடைக்காமல் தடுமாறி வருகிறாராம்.

தமிழ் சினிமாவில் விஜய் சேதுபதி என்ற நடிகரை வித்தியாசமான கோணத்தில் காட்டி ரசிகர்களுக்கு பிடித்த நடிகராக மாற்றி விட்டவர் இயக்குனர் நலன் குமாரசாமி. சூது கவ்வும் படத்தின் வெற்றிக்கு பிறகு மீண்டும் இருவரும் இணைந்து கொரிய படத்தின் ரீமேக்காக காதலும் கடந்து போகும் என்ற படத்தில் இணைந்தனர்.

சூது கவ்வும் படத்தின் வெற்றியில் பாதி கூட காதலும் கடந்து போகும் படம் பெறவில்லை. இதனால் நலன் குமாரசாமிக்கு அடுத்தடுத்த பட வாய்ப்புகள் கிடைக்காமல் போய்விட்டது. இடையில் விஜய் சேதுபதியிடம் ஒரு பட வாய்ப்பு கேட்டதாகவும் தகவல்கள் வெளிவந்தன.

இந்நிலையில் விஜய் சேதுபதி வேலைக்கு ஆகாது என ஐந்து வருடம் கழித்து பிரபல நடிகர் ஆர்யாவுடன் சேர்ந்து ஒரு படத்தில் பணியாற்ற உள்ளாராம் நலன் குமாரசாமி. இந்த படத்தை ஸ்டுடியோ கிரீன் நிறுவனம் ஞானவேல்ராஜா தயாரிக்கிறார். இந்த படம் வெற்றி பெற்றால் மட்டுமே நலன் குமாரசாமி சினிமாவில் நிலைக்க முடியும் என்பதால் திரைக்கதையை கவனத்துடன் எழுதி வருகிறாராம்.